ہوڈیں دے لہہ گاڈے کنوں

 باہر نکل کھاڈے کنوں

 مِلدے خدا تاڈے کنوں

 مسئلہ اے پچھ ڈاڈے کنوں

 کر نہ ایویں زندگی بسر

توں وی بشر سئیں وی بشر

عقل پکڑ اللہ توں ڈر

 عنصر تیڈا ڈیواں ڈسا 

مٹی ہوا پانی تے بھا

شولو نہ چھٹ مغز نہ کھا

 ماہی مٹھا نوری ضیاء 

عرشاں تے گھر فرشاں تے گھر

 تو وی بشر سائیں وی بشر 

عقل پکڑ اللہ تو ڈر

 

 قدمیں کوں نپ وحی پیا چلے

 سدرہ جیندے پیریں تلے

 اُتھاں ونجے اِتھاں ولے

 گالھیں جو نیں پوندیاں پلے

 اُلٹی سمجھ اُلٹے چکر

تو وی بشر سائیں وی بشر 

عقل پکڑ اللہ تو ڈر

 

اینجھا بیا جگ تے ڈکھا

حوراں کرن جیندی ثناء

نوری بنن در دے گدا 

گولے خدا جیندی رضا

 کلمہ پڑھن مُٹھ اِچ پتھر

تو وی بشر سائیں وی بشر 

عقل پکڑ اللہ تو ڈر

صفتان جیندیاں اماں ڈسائے 

بختیں بھریا ویڑھے جو آئے

 ڈیوے ولا میں نئیں جگائے

پینگھے دے وچ انگل ہلائے

 دوڑاں کھڑا لاوے قمر

تو وی بشر سائیں وی بشر 

عقل پکڑ اللہ تو ڈر

 

صادق سڈن اپنے پرائے

 کملی وچھا کافر بلھائے

خلقیں دا سئیں خلقاں سکھائے

کلمہ پڑھائے مومن بنائے

تئیں توں پریں بھجدے نفر

تو وی بشر سائیں وی بشر 

عقل پکڑ اللہ تو ڈر

 

 سوچاں وی ہن عاجز جتھاں

ذہنیں دیاں سُن تھیون متھاں

 اندھے ودن پاتی وِتھاں

آدم کتھاں مدنی کتھاں

 یسٰین پڑھ یا اَلفجر

تو وی بشر سائیں وی بشر 

عقل پکڑ اللہ تو ڈر

 

کیتے جنھاں راشد قدر

بغلیں ستے روضے اندر  

رحمت دا ہئیں خواہاں جیکر

 سڑیاں نہ کھا توبہ چا کر

 ڈیسا خدا سوہنا اجر

تو وی بشر سائیں وی بشر 

عقل پکڑ اللہ تو ڈر