اوں آکھیا ھا اگلی واری

جیلھے رت رنگیلی تھیسی

جیلھے موسم ڈوھڑے گاسی

جیلھے ساوݨ ستویں سر اچ

پہلی پیار دی سرگم گاسی

پیلے پھل جاں سرمی چاسی

وعدیں دے پڑ پکے تھیسن

عشق دے ہتھیں مہندیاں لگسن

نچ نچ خواب دھمالاں پیسن

پریاں آن سلامی ڈیسن

تیڈے آ تے پیر دھوسن

پار اروار دے فاصلے مکسن

آپاں ھکی بھک تھی ویسوں

میڈا مطلب ھک تھی ویسوں

ستواں سال اے اوندی بھال اے

اساں ھکی بھک نی تھئیے

ڈو دے ڈو ہیں ھک نی تھیئے

پار اروار دے فاصلے انویں

نہ کہیں میڈے پیر دھوائے

نہ کہیں آن سلامی ڈتڑی

انویں خواب ادھورے رہ گئے

وعدیں دے پڑ پکے نہ تھئے

عشق دے ہتھ نہ مہندیاں لگیاں

سرمی پیلے پھل وی چائے

رتاں پیار دی سرگم چھیڑی

ساوݨ وی سر ستویں لاتے

موسم وی ہن ڈوھڑے گائے

پل وی رنگ رنگیلے تھئے ہن

اماں رڑی او میڈی اماں

 اماں رڑی او مٹھی اماں

کیامیں ایڈی بدقسمت ھاں؟

ستویں واری پھل سرمی دیں

سر تے پیلے بوچھݨ پائے ہن

میڈے ہتھ نہ پیلے تھئے ہن

میڈے ہتھ نہ پیلے تھئے ہن 

         فیض احمد شازم