ایتھاں لُمب کوں شریف آہدِن ~ شاعری

شَہر وِچ شُور تِھیندا گئے ، اَساں چُپ چاپ تِھیندے گئیوں

جَبر منہ زور تِھیندا گئے، اَساں چُپ چاپ تِھیندے گئیوں

شَریریں دے شَہر کولوں، تے ناَنگیں دے زَہر کولوں

کہیں ظالم دے ڈر کولوں، اے دل کمزور تِھیندا گئے

اَساں چُپ چاپ تِھیندے گئیوں، جَبر منہ زور تِھیندا گئے

اَساں چُپ چاپ تِھیندے گئیوں، اِیتھاں ہر کوئی چُوکھیرے دا

یا ڈاکو کہیں لُٹیرے دا، یا کئہیں غاصِب وڈیرے دا

ساڈے نال کھئور تِھیندا گئے، اَساں چُپ چاپ تِھیندے گئیوں

جَوانیں کوں ضعیف آہدِن، چغل خوریں کو چیف آہدِن

ایتھاں لُمب کوں شریف آہدِن، شریف اِیتھ چور تِھیندا گئے

اَساں چُپ چاپ تِھیندے گئیوں

نمازی ہِن اَذاں آہدِن، ولا کیوں دُھپ کوں چَھاں آہدِن

اِیتھاں موریں کوں کاں آہدِن، او کاں ھا مور تِھیندا گئے

اَساں چُپ چاپ تِھیندے گئیوں، جَبر منہ زور تِھیندا گئے

اَساں چُپ چاپ تِھیندے گئیوں، میں عشرت کے تانڑیں رُلاں

سٹیئوم دربار تے جُھلاں، مَسیتیں دا وکاؤ مُلاں

وظیفے خور تِھیندا گئے، اَساں چُپ چاپ تِھیندے گئیوں

جبر منہ زور تھیندا گئے، اَساں چُپ چاپ تھیندے گئیوں

سائیں عشرت لغاری۔

شاعری اپلوڈ